Fimmtudaginn, 13. mars, hófu tólf flutningarbílar ferð sína frá Selfossi til Húsavíkur með sex íbúða raðhús Bjargs, um sólahring seinna var húsið risið á Húsavík. Hvert hús samanstendur af tveimur einingum.

Nýju húsin eru að Lyngholti 42-52 á Húsavík. Ferðalagið tók um 16 klukkutíma og var bílalestin komin á leiðarenda um hádegi, föstudaginn 14. mars. Aka þurfti um 800 km leið þar sem ekki var hægt að fara í gegnum nein jarðgöng eða minni og þrengri brýr. Þegar á leiðarenda var komið var strax hafist handa við að hífa húsin á grunninn sem beið tilbúinn á Húsavík. Fyrsta einingin var komin niður á grunn um klukkan 12.00 og sú síðasta klukkan 19.30 á föstudagskvöldinu. Áætlað er að húsin verði að fullu tilbúin og íbúðir allar afhentar nýjum leigutökum í apríl.

Um er að ræða nýsköpunarverkefni þar sem íbúðirnar voru smíðaðar á Selfossi og fluttar nánast fullbúnar norður. Á sama tíma og húsin voru í smíðum á Selfossi sáu heimamenn á Húsavík um jarðvinnu og sökkla fyrir húsið. Þannig var hægt að vinna að tveimur verkþáttum á sama tíma sem styttir byggingartíma töluvert.

Íbúðunum hefur öllum verið úthlutað. Frekari upplýsingar um íbúðirnar má finna hér.

Sjá umfjöllun á Vísi hér.

Hér fyrir neðan má sjá myndir af ferðalaginu: